Yaduwar cutar HIV na raguwa a Najeriya

Rahotanni sun bayyana cewa an samu raguwar masu kamuwa da cutar HIV a Najeriya cikin watanni hudu na farkon shekarar 2026, lamarin da masana harkar lafiya suka bayyana a matsayin babban ci gaba a yaki da cutar.

A cewar rahoton, daga watan Janairu zuwa Afrilu na shekarar 2026, adadin sabbin masu kamuwa da cutar ya ragu idan aka kwatanta da shekarun baya, yayin da ake ci gaba da wayar da kai da kuma samar da magungunan kariya da na rage yaduwar cutar.

Masana sun danganta wannan nasara da karin gwaje-gwaje da ake yi, amfani da magungunan kariya, da kuma yadda gwamnati da kungiyoyin lafiya suke kara fadada shirye-shiryen kula da masu dauke da cutar HIV a fadin kasar nan.

Rahoton ya kuma nuna cewa sabon maganin HIV mai suna Lenacapavir yana kara samun karbuwa a Najeriya, inda masana suka ce yana taimakawa wajen rage yaduwar cutar da kuma saukaka rayuwar masu fama da ita.

Sai dai masana sun bukaci gwamnati da ta ci gaba da kara zuba jari a bangaren lafiya domin tabbatar da cewa an ci gaba da rage yaduwar HIV tare da samar da magunguna ga masu bukata a kowane lokaci.