Ɓangaren Nafiu Bala ya tsayar da Chris Uba a matsayin dan takarar Shugaban Ƙasa

Ɓangaren jam’iyyar ADC da ke ƙarƙashin jagorancin Nafiu Bala ya bayyana ɗan kasuwa kuma farfesa, Chris Uba, a matsayin ɗan takararsa na shugaban ƙasa a zaɓen shekarar 2027.

Wannan mataki ya zo ne yayin da rikicin shugabanci ke ci gaba da raba jam’iyyar gida uku, inda kowane ɓangare ke ikirarin shi ne halastaccen jagoran ADC.

An bayyana zaɓen Chris Uba ne bayan kammala taron ɓangaren Nafiu Bala, wanda ya ce an gudanar da dukkan matakan tantance masu neman takara cikin gaskiya da adalci. Rahotanni sun nuna cewa an amince da Uba a matsayin wanda zai jagoranci jam’iyyar a babban zaɓen shugaban ƙasa mai zuwa.

Lamarin ya sake nuna yadda rikicin cikin gida ke ci gaba da dabaibaye ADC, musamman bayan da wasu ɓangarorin jam’iyyar suka kafa shugabanci daban-daban tare da gabatar da nasu ‘yan takarar shugaban ƙasa.

A baya ma wani ɓangare ya ayyana tsohon ɗan takarar shugaban ƙasa na ADC, Dumebi Kachikwu, a matsayin zaɓinsa na 2027.

Rikicin ya kai har ga kotuna da kuma hukumar zaɓe ta ƙasa INEC, wadda ta taɓa dakatar da amincewa da shugabannin ɓangarorin jam’iyyar saboda shari’o’in da ke gudana kan sahihancin shugabanci. Duk da haka, har yanzu kowane ɓangare na ci gaba da gudanar da harkokinsa daban-daban.

Masu sa ido kan siyasar Najeriya na ganin cewa yawaitar ɓangarori da ‘yan takara a cikin ADC na iya shafar ƙarfin jam’iyyar wajen fuskantar babban zaɓen 2027, musamman a daidai lokacin da jam’iyyun adawa ke ƙoƙarin haɗa kai domin kalubalantar jam’iyyar APC mai mulki.