FAAC ta raba Naira tiriliyan 2.3 tsakanin gwamnatin tarayya, jihohi da kananan hukumomi

Kwamitin raba kudin shiga na tarayya (FAAC) ya sanar da raba jimillar kudaden shiga na watan Mayun 2026 da suka kai Naira tiriliyan 2.3 tsakanin Gwamnatin Tarayya, gwamnatocin jihohi da kuma kananan hukumomi.

An amince da rabon kudin ne a taron FAAC da aka gudanar a Abuja, inda aka bayyana cewa kudaden sun samo asali ne daga harajin VAT da sauran hanyoyin samun kudin shiga na gwamnati.

A cewar bayanan kwamitin, Gwamnatin Tarayya ta samu kusan Naira biliyan 787.4, yayin da jihohi suka karbi kusan Naira biliyan 772.4, sannan kananan hukumomi suka samu kusan Naira biliyan 540.2.

Haka kuma, an ware Naira biliyan 157.3 a matsayin kudin kaso 13 cikin 100 na albarkatun ma’adinai ga jihohin da abin ya shafa.

Rahoton ya nuna cewa kudaden harajin kamfanoni (CIT), harajin ribar jari (CGT), kudin shigo da kaya, kudaden hakar mai da iskar gas da kuma VAT sun karu sosai a lokacin da ake nazari. Sai dai wasu hanyoyin samun kudaden shiga kamar Petroleum Profit Tax (PPT) da Hydrocarbon Tax sun samu raguwar kudaden shiga.

Masana tattalin arziki na ganin cewa karin kudaden da aka raba zai taimaka wa gwamnatoci wajen gudanar da ayyukan raya kasa da biyan bukatun jama’a, musamman a wannan lokaci da ake fama da matsin tattalin arziki. Sai dai sun bukaci a tabbatar an yi amfani da kudaden yadda ya kamata domin al’umma su amfana da karin kudaden da aka samu.