Sarkin Musulmi ya buƙaci Tinubu da ’yan siyasa su guji abin da zai haddasa rikici lokacin zaɓe
Sarkin Musulmi ya buƙaci Tinubu da ’yan siyasa su guji abin da zai haddasa rikici lokacin zaɓe
Sarkin Musulmi, Alhaji Muhammad Sa’ad Abubakar III, ya yi kira ga Shugaba Bola Ahmed Tinubu da sauran ’yan siyasa da su tabbatar da gudanar da kamfen cikin lumana, tare da kauce wa duk wani abu da ka iya haddasa rikici ko rarrabuwar kawuna a tsakanin ’yan Najeriya yayin shirye-shiryen babban zaɓen shekarar 2027.
Sarkin ya jaddada muhimmancin zaman lafiya da haɗin kai a ƙasar, yana mai cewa ya kamata ’yan siyasa su mayar da hankali kan manufofin da za su inganta rayuwar al’umma, maimakon amfani da maganganun da za su tayar da hankali ko haifar da ƙiyayya tsakanin magoya bayan jam’iyyun siyasa daban-daban.
Ya kuma buƙaci ’yan siyasa da su mutunta ra’ayoyin juna, tare da tabbatar da cewa yakin neman zaɓensu bai zama sanadin tashin hankali ko rikicin da zai kawo cikas ga zaman lafiyar al’umma ba.
A cewarsa, ya zama wajibi shugabanni su zama abin koyi wajen nuna dattako da bin doka a dukkan harkokin siyasa.
Wannan kira na Sarkin Musulmi na zuwa ne a daidai lokacin da ake ƙara shirye-shiryen babban zaɓen 2027, inda ake buƙatar ’yan siyasa da magoya bayansu su fifita zaman lafiya, haɗin kan ƙasa da ci gaban Najeriya fiye da bambance-bambancen jam’iyya ko muradun siyasa.
