’Yan sanda a Adamawa sun kama mutane uku kan zargin garkuwa da mutane, sun kwato bindigogin AK-47 biyu

Rundunar ’Yan Sandan Jihar Adamawa ta kama wasu mutane uku da ake zargi da hannu a laifukan haɗa baki, mallakar makamai ba bisa ƙa’ida ba da kuma satar mutane.

An kama waɗanda ake zargin a ranar 15 ga Oktoba, 2026, bayan sace Ahmadu Abubakar, Habu Alhaji Bello da Hussaini Habu.

Rundunar ta ce ta kwato bindigogin AK-47 guda biyu, magazin guda huɗu, harsasai guda 45, kuɗi Naira miliyan 5.52, da motar Toyota, tare da wasu kayayyakin da ake zargi suna da alaƙa da aikata laifuka.

Ta kuma bayyana cewa ana ci gaba da ƙoƙarin cafke sauran waɗanda suka tsere domin gurfanar da su a gaban shari’a.

A wani labarin kuma, ’yan sanda sun kama wani mutum mai suna Muhammed Alamin, wanda ake zargi da satar babur mai amfani da wutar lantarki, wanda aka fi sani da Salti, a kusa da kasuwar zamani ta Jimeta.

An kama shi ne bayan an gano shi ta hotunan kyamarar tsaro da aka yaɗa a kafafen sada zumunta, inda aka kuma mayar da babur ɗin ga mai shi.

Kwamishinan ’Yan Sandan Jihar Adamawa, CP Kabir Umar Hassan, ya jaddada aniyar rundunar na yaƙi da laifuka da kare rayuka da dukiyoyin al’umma.

Ya kuma buƙaci mazauna jihar da masu kasuwanci su kasance masu sanya ido tare da kai rahoton duk wani motsi da ake zargi ga hukumomin tsaro domin taimakawa bincike da tabbatar da zaman lafiya.