Gwamna Fintiri ya ce Adamawa ta zama jiha mai goyon bayan Tinubu 100% inda ya yi hasashen nasarar APC a 2027

Gwamnan Jihar Adamawa, Ahmadu Umaru Fintiri, ya bayyana cewa Adamawa ta kasance jiha mai goyon bayan Shugaban Ƙasa Bola Ahmed Tinubu, yana mai jaddada cewa al’ummar jihar za su mara masa baya a zaɓen shugaban ƙasa na shekarar 2027.

Gwamnan ya bayyana hakan ne a ranar Litinin, yayin ƙaddamar da yaƙin neman zaɓen ƙungiyar PBAT Door-to-Door Movement 2027 a birnin Yola.

Fintiri, wanda ya yi wannan furuci a gaban masu ruwa da tsaki na jam’iyyar APC, ya ce: “Wannan jihar Asiwaju ce,” yana mai nuna ƙwarin gwiwarsa cewa Tinubu zai samu goyon bayan jihar duk da cewa tsohon mataimakin shugaban ƙasa, Atiku Abubakar, wanda ɗan asalin Adamawa ne, yana cikin masu neman shugabancin ƙasar. Atiku dai yana jam’iyyar African Democratic Congress (ADC).

Gwamnan ya ƙara da cewa jihar za ta mara wa Tinubu baya saboda abin da ya kira sadaukarwar da shugaban ƙasar ya yi wajen tunkarar ƙalubalen da Najeriya ke fuskanta.

Ya kuma bayyana cewa sauye-sauyen tattalin arzikin da gwamnatin tarayya ta aiwatar sun taimaka wajen bai wa jihohi damar gudanar da ayyukan raya ƙasa, yana mai cewa alhakin inganta rayuwar jama’a da rage wahalhalun tattalin arziki ya rataya a wuyan gwamnatin tarayya da ta jihohi baki ɗaya.

A nasa jawabin, shugaban APC na jihar Adamawa, Hamza Madagali, ya bayyana kwarin gwiwarsa cewa jam’iyyar za ta samu gagarumar nasara a zaɓen 2027.

Madagali ya yi hasashen cewa babu wani ɗan takarar shugaban ƙasa da zai samu kashi 25 cikin 100 na ƙuri’un jihar in ba Tinubu ba, furucin da ke nuna irin ƙarfin gwiwar shugabannin APC na jihar gabanin babban zaɓen da ke tafe.