Trump ya soki kwamitin ba da kyautar Nobel kan rashin ba shi kyautar zaman lafiya

Shugaban Amurka, Donald Trump, ya bayyana rashin ba shi kyautar zaman lafiya ta Nobel ta shekarar 2026 a matsayin abin kunya da rashin dacewa, yana mai cewa Amurka, wadda yake wakilta, ta cancanci samun kyautar.

Trump ya bayyana hakan ne yayin wani gangamin siyasa a Syracuse, jihar New York, inda ya soki kwamitin da ke zaɓen waɗanda za su samu kyautar.

Trump ya kuma zargi kwamitin da rage darajar kyautar, yana mai cewa shawarar da aka yanke ta nuna rashin adalci.

Ya sake ikirarin cewa ya taimaka wajen kawo ƙarshen yaƙe-yaƙe guda takwas tun bayan komawarsa kan mulki, tare da cewa yana ƙoƙarin sasanta wasu rikice-rikice, ciki har da yaƙin Rasha da Ukraine.

Wanda ya lashe kyautar zaman lafiyar Nobel ta 2026 ita ce Navi Pillay, ’yar Afirka ta Kudu, wadda ta taɓa zama babbar jami’ar Majalisar Ɗinkin Duniya mai kula da haƙƙin ɗan Adam, kuma tsohuwar alƙaliyar Kotun Hukunta Manyan Laifuffukan Ƙasa da Ƙasa.

An karrama ta ne bisa ƙoƙarinta na inganta zaman lafiya da dokokin ƙasa da ƙasa.

Trump ya bayyana cewa rashin ba shi kyautar ya jefa tabo marar gogewa a kan ƙasar Norway, inda kwamitin Nobel yake.

Sai dai kwamitin na Nobel mai zaman kansa ne wajen zaɓen waɗanda za su samu kyautar, kuma shawarar da ya yanke ta bai wa Pillay kyautar ta jawo ce-ce-ku-ce a tsakanin wasu shugabannin siyasa da masu sharhi kan harkokin ƙasa da ƙasa.