Rikici ya kaure a Majalisar Wakilai yayin da aka nemi Tinubu ya yi bayani kan ayyukan mazabu

An shiga hayaniya a zauren Majalisar Wakilai a ranar Laraba bayan wasu ‘yan majalisa suka gabatar da ƙudirin gayyatar Shugaban Ƙasa, Bola Ahmed Tinubu, domin ya yi bayani kan jinkirin sakin kuɗaɗen ayyukan mazabu da aka tanada a kasafin kuɗi.

Tashin hankalin ya fara ne lokacin da wasu mambobin majalisar suka nuna rashin amincewa da yadda ake tafiyar da ƙudirin, lamarin da ya haifar da muhawara mai zafi har ta kai ga katse zaman na ɗan lokaci.

Masu goyon bayan ƙudirin sun ce jinkirin aiwatar da ayyukan mazabu na ci gaba da jefa al’ummomin da suke wakilta cikin matsala, saboda haka suna son shugaban ƙasa ya yi cikakken bayani kan dalilan da suka haddasa tsaikon.

Duk da rikicin da ya ɓarke, shugabannin majalisar sun yi ƙoƙarin kwantar da hankalin mambobin tare da ci gaba da gudanar da zaman, yayin da batun ke ci gaba da jan hankalin jama’a da masu ruwa da tsaki a harkokin siyasar ƙasar.