FRSC ta bukaci hadin kan masu ruwa da tsaki don dakile haduran hanya a Adamawa

Hukumar Kiyaye Haɗurran Mota ta Ƙasa (FRSC), reshen Jihar Adamawa, ta yi kira ga gwamnati, hukumomin tsaro, al’umma da sauran masu ruwa da tsaki da su ƙara haɗin gwiwa domin rage yawan haɗurran ababen hawa a jihar.

Kwamandan FRSC na Adamawa, Corps Commander Sadiq Ibrahim, ya yi wannan kiran ne a yayin wani taron tattaunawa da aka gudanar a Yola ranar Laraba.

Taron wanda taken sa shi ne “Daga Fadakarwa zuwa Aiki: Ƙarfafa Matakan Kare Rayuka a Hanya ta Hanyar Haɗin Kan Masu Ruwa da Tsaki,” ya mayar da hankali ne kan ɗaukar matakan da za su samar da sakamako kai tsaye wajen inganta tsaron hanyoyi.

Ibrahim ya bayyana cewa kare rayukan masu amfani da hanya ba nauyin hukuma guda ɗaya ba ne, sai dai alhakin kowa ne da ke buƙatar ɗorewar haɗin kai da aiki.

Kwamandan ya ce haɗurran hanya na ci gaba da zama babban abin damuwa ga tsaron al’umma, saboda suna janyo asarar rayuka, nakasa da kuma matsin tattalin arziki ga iyalai.

Ya bukaci gwamnatin jihar da abokan hulɗar ci gaba su ci gaba da zuba jari wajen inganta hanyoyi da tsarin agajin gaggawa, yayin da ya kuma yi kira ga al’umma da su rika kai rahoton munanan ɗabi’un masu amfani da hanya tare da mutunta dokokin zirga-zirga.

A nasa jawabin, Mataimakin Shugaban Jami’ar Modibbo Adama da ke Yola, Prof. Iliyasu Audu, wanda ya wakilci mataimakin shugaban jami’ar, Prof. Ibrahim Umar, ya bayyana cewa ɗalibai 11 sun rasa rayukansu sakamakon haɗurran hanya a hanyar Yola zuwa jami’ar.

Shi ma Shugaban Kwamitin Sufuri na Majalisar Dokokin Adamawa, Jingi Ahmed, ya ce tsaron hanya muhimmin abu ne, yana mai cewa majalisar a shirye take ta karɓi duk wani ƙudirin doka daga bangaren zartarwa da zai ƙara inganta tsaron ababen hawa a jihar.