Atiku, Peter Obi da wasu ’yan adawa sun fara shirin haɗa kai domin kayar da Tinubu – Lukman

Salihu Lukman, jigo a ƙoƙarin haɗa kan ’yan adawa a Najeriya, ya bayyana cewa an fara tattaunawa tsakanin jam’iyyun adawa da wasu ’yan takarar shugaban ƙasa domin samar da haɗin kai da zai kalubalanci Shugaba Bola Ahmed Tinubu a zaɓen 2027.

Lukman ya bayyana cewa tattaunawar ta haɗa da tsohon mataimakin shugaban ƙasa, Atiku Abubakar na jam’iyyar ADC; tsohon gwamnan Jihar Anambra, Peter Obi na NDC; Gwamnan Jihar Oyo, Seyi Makinde na APM; Prince Adewole Adebayo na SDP da tsohon gwamnan Jihar Cross River, Donald Duke na PRP.

Ya ce tattaunawar na daga cikin ƙoƙarin aiwatar da shawarwarin taron ƙungiyar G-100 na ’yan adawa, wanda ya buƙaci jam’iyyun adawa su ƙarfafa haɗin kai da haɗin gwiwa domin kare dimokuraɗiyya da muradun ’yan Najeriya.

Ya ƙara da cewa ana tattaunawa ne domin samar da tsarin haɗin gwiwa, gano abubuwan da suka haɗa su da kuma tsara dabarun da za su bi gabanin zaɓen 2027.

Sai dai Lukman ya bayyana cewa tattaunawar na ci gaba da gudana, kuma ba a cimma matsaya kan ɗan takara guda da zai wakilci ’yan adawa ba.

Ya ce za a sanar da ’yan Najeriya muhimman shawarwarin da aka cimma da matakan da za a ɗauka yayin da tattaunawar ke ci gaba.