An kama sojan da ake nema ruwa a jallo kan zargin kai wa ƴan ta’adda kayan sojoji

Dakarun rundunar sojin Najeriya sun cafke wani soja da a baya aka ayyana neman ruwa a jallo saboda zarginsa da hannu wajen kai wa ‘yan ta’adda da wasu miyagun laifuffuka kayan aikin sojoji, musamman kayan sanye na soja.

A cewar bayanan da Rundunar Sojin Najeriya ta fitar, an kama sojan ne yayin da yake ƙoƙarin tsallakawa zuwa ƙasar Kamaru ta hanyar yankin Borno, bayan dakarun Operation HADIN KAI sun bi sawunsa. Rahoton bai bayyana takamaiman gari ko ƙauyen da aka kama shi ba, sai dai ya nuna cewa kamun ya faru ne a yankin Arewa maso Gabas kusa da iyakar Najeriya da Kamaru.

Bayan ayyana shi a matsayin wanda ake nema, jami’an tsaro suka ƙaddamar da farautarsa, lamarin da ya kai ga nasarar cafke shi domin ci gaba da gudanar da cikakken bincike kan zarge-zargen da ake masa.

Rundunar Sojin Najeriya ta sake jaddada cewa ba za ta lamunci duk wani soja da zai taimaka wa ‘yan ta’adda ko wasu miyagun laifuffuka ta hanyar sayarwa ko karkatar da kayan aikin soja ba, tare da gargadin cewa masu laifi za su fuskanci hukuncin doka.

Haka kuma rundunar ta tabbatar wa ‘yan Najeriya da cewa za ta ci gaba da ƙarfafa matakan tsaro da sa ido a cikin rundunar domin kare mutuncinta da kuma tabbatar da cewa duk wanda aka samu da laifi zai fuskanci hukunci bisa tanadin dokokin soja da na ƙasa.