Gwamna Uba Sani ya bayyana cewar Tinubu ya cika duk Alkawuran da ya daukar wa Al’ummar Kaduna

Gwamnan Jihar Kaduna, Sanata Uba Sani, ya bayyana cewa Shugaban Ƙasa Bola Ahmed Tinubu ya cika manyan alkawura guda biyu da ya ɗauka wa al’ummar jihar a lokacin kamfen ɗinsa na neman shugabancin Najeriya a shekarar 2022.

Gwamnan ya bayyana hakan ne a ranar Asabar yayin gangamin ƙaddamar da kamfen ɗin jam’iyyar APC na neman sake zaɓen Tinubu a shekarar 2027, wanda aka gudanar a filin wasa na Ranchers Bees da ke Kaduna.

Uba Sani ya ce ɗaya daga cikin alkawuran shi ne sake gina hanyar Kaduna zuwa Birnin Gwari, wadda ya bayyana cewa an daɗe ana watsi da ita sama da shekaru 40.

Ya ce aikin sake gina hanyar mai tsawon kilomita 133 yana gudana a halin yanzu, tare da bayyana cewa gwamnatin Tinubu ta kuma ɗauki matakan inganta tsaro a yankin, wanda a baya ya yi fama da matsalar ’yan bindiga da satar mutane.

Gwamnan ya ƙara da cewa ingantuwar tsaro ta taimaka wajen sake buɗe makarantu sama da 300 da cibiyoyin kiwon lafiya na matakin farko fiye da 150, waɗanda aka rufe a baya sakamakon matsalar rashin tsaro.

Haka kuma, ya yaba wa gwamnatin tarayya kan ayyukan more rayuwa da suka haɗa da aikin layin dogo na cikin birnin Kaduna, wanda ya ce an amince da ware dala miliyan 865 domin gudanar da shi, da kuma shirin tallafin lamunin karatu da ya ce ya amfani ɗalibai a yankin Arewa maso Yamma.

A ƙarshe, Uba Sani ya buƙaci al’ummar Kaduna da sauran ’yan Najeriya da su sake bai wa Tinubu goyon baya a zaɓen shugaban ƙasa na shekarar 2027, yana mai cewa ayyukan raya ƙasa da manufofin gwamnatinsa sun cancanci a ci gaba da su.

Shi ma Mataimakin Shugaban Ƙasa, Kashim Shettima, ya yi kira ga ’yan Najeriya da su mara wa gwamnatin Tinubu baya, yana mai cewa tana ƙoƙarin inganta ci gaban ƙasa da kuma magance ƙalubalen tattalin arziki.