Pastor Ayodele ya yi hasashen samun rikicin siyasa a Najeriya idan Tinubu ya sha kaye

Shugaban Cocin INRI Evangelical Spiritual Church, Primate Elijah Ayodele, ya yi hasashen cewa Najeriya za ta iya shiga cikin rikicin siyasa da rudani idan Shugaban Ƙasa Bola Ahmed Tinubu ya sha kaye a zaɓen shugaban ƙasa na shekarar 2027.

Faston ya ce irin wannan yanayi na iya ɗaukar lokaci mai tsawo kafin a samu daidaito.

Ayodele ya bayyana cewa rashin nasarar Tinubu na iya jawo mummunan rikici, inda ya yi gargaɗin cewa wasu ’yan siyasa za su iya fuskantar koma-baya mai tsanani.

Ya kuma yi hasashen yiwuwar samun yunƙurin hana sanar da sakamakon zaɓe, lamarin da ya ce zai iya ƙara tayar da hankali a ƙasar.

Faston ya kuma yi gargaɗin cewa zaɓen na 2027 na iya haddasa rikicin ƙabilanci tare da haifar da rashin tabbas game da mika mulki ga wanda ya yi nasara. Sai dai waɗannan kalamai hasashe ne na Ayodele, ba tabbataccen abin da zai faru ba.

Dangane da jam’iyyar APC mai mulki, Ayodele ya ce nasararta a zaɓen 2027 ba tabbatacciya ba ce, duk da kwarin gwiwar da ya ce mambobinta da magoya bayanta ke nunawa. Ya ƙara da cewa idan Tinubu ya sha kaye, hakan na iya yin tasiri ga tsarin zaɓe a Najeriya.