Ba zan zama kamar Buhari ba, zan kasance mai cikakken iko idan na zama Shugaban ƙasa – Peter Obi

Dan takarar shugaban ƙasa na jam’iyyar NDC, Peter Obi, ya ce idan aka zabe shi a 2027, zai tabbatar da cewa shi ne ke da cikakken ikon tafiyar da gwamnati, ba tare da barin wasu mutane su yi masa mulki a madadinsa ba.

Peter Obi ya bayyana cewa ba zai gudanar da mulki irin na marigayi tsohon Shugaban Ƙasa Muhammadu Buhari ba, inda ya jaddada cewa idan aka ba shi damar jagorantar Najeriya a 2027, zai kasance mai cikakken iko da alhakin tafiyar da gwamnatin ƙasar.

Obi ya yi wannan bayani ne yayin da yake bayyana shirinsa na neman kujerar Shugaban Ƙasa a babban zaɓen 2027. Ya ce shugaba ya kamata ya kasance mai cikakken iko da alhakin yanke muhimman shawarwari da suka shafi tafiyar da ƙasa, tare da tabbatar da cewa gwamnati na aiki yadda ya kamata.

Tsohon ɗan takarar shugaban ƙasa na Labour Party a zaɓen 2023 ya kuma jaddada muhimmancin samar da shugabanci mai inganci da zai mayar da hankali kan matsalolin tattalin arziki, tsaro da sauran ƙalubalen da ke addabar Najeriya.

Yaƙin neman zaɓen 2027 na ƙara ɗaukar zafi yayin da manyan ‘yan siyasa ke bayyana manufofinsu da kuma kokarin samun goyon bayan masu kaɗa ƙuri’a, yayin da Obi ke neman mayar da kansa cikin manyan ‘yan takarar da za su fafata a zaɓen shugaban ƙasa.