Tsofaffin sojoji sun tare ƙofar hukumar fansho a Abuja kan ƙarin kuɗin fansho

Tsofaffin sojojin Najeriya sun tare ƙofar shiga hedikwatar Hukumar Fansho ta Sojoji da ke Dutse Alhaji, Abuja, a ranar Talata, 13 ga Oktoba, 2026, domin nuna rashin gamsuwarsu da tsarin da aka bi wajen ƙididdige ƙarin kuɗin fanshonsu.

Masu zanga-zangar sun tare ƙofar hukumar da tantuna da kujeru tun da misalin ƙarfe 8 na safe, yayin da sojoji masu ɗauke da makamai suka hana su shiga harabar ofishin.

Matakin ya zo ne makonni bayan da tsofaffin sojojin suka gudanar da wata zanga-zanga a Ma’aikatar Tsaro, inda suka nemi a ƙara musu fansho sakamakon ƙarin albashin sojojin da ke aiki.

Mai kula da ƙungiyar Veterans Association of Nigeria, Laftanar Kanal Innocent Azubike mai ritaya, ya zargi hukumar da amfani da tsarin ƙididdigar fansho wanda, a cewarsa, bai yi wa wasu tsofaffin sojoji adalci ba.

Ya ce tsarin ya haifar da bambancin kuɗin fansho tsakanin sojojin da suka yi aiki na tsawon lokaci iri ɗaya kuma suke da matsayi iri ɗaya, amma suka yi ritaya a lokuta daban-daban.

Tsofaffin sojojin na neman a sake duba tsarin ƙididdige ƙarin fansho domin tabbatar da adalci, tare da binciken yadda aka sarrafa kuɗaɗen fansho da kuma biyan duk wani haƙƙi da ya rage musu.

A nasa ɓangaren, Shugaban Hukumar Fansho ta Sojoji, Air Vice Marshal Mikail Abdulraheem, ya tabbatar da aniyar hukumar na tabbatar da cewa tsofaffin sojoji sun amfana da ƙarin albashi da fansho da aka amince da shi.