‘Yan bindiga sun kai hari a Agatu tare da kashe basarake da matarsa

Wasu ‘yan bindiga sun kai hari a yankin Agatu a Jihar Benue, inda suka kashe mutane da dama ciki har da wani basarake da matarsa. Lamarin ya faru ne a daren ranar Alhamis a ƙauyen Olegabulu, abin da ya jefa mazauna yankin cikin firgici da tashin hankali.

Rahotanni sun nuna cewa maharan sun kutsa cikin al’ummar ne ba zato ba tsammani, inda suka fara harbe-harbe kan mai uwa da wabi, lamarin da ya haddasa asarar rayuka da dama. An ce wasu daga cikin mazauna yankin sun tsere zuwa dazuka domin tsira da rayukansu.

An bayyana cewa daga cikin waɗanda suka rasa rayukansu akwai wani shugaban gargajiya tare da matarsa, abin da ya ƙara dagula al’amura a yankin da tuni ke fama da matsalolin tsaro. Har yanzu ba a tantance cikakken adadin waɗanda suka mutu ba a hukumance.

Wasu mazauna yankin sun bayyana cewa hare-haren sun dade suna faruwa a yankin Agatu, kuma sun ƙara tsananta a ‘yan kwanakin nan, lamarin da ke nuna ƙaruwar rashin tsaro a yankin.

Har zuwa lokacin fitar da wannan rahoto, jami’an tsaro ba su fitar da cikakken bayani kan harin ba, amma ana ci gaba da kira ga gwamnati da ta ɗauki matakan gaggawa domin kare rayuka da dukiyoyin al’umma.