Rikicin ‘yan daba: Mutum daya ya mutu, an kama tara a Kano
An kashe mutum ɗaya kuma an kama mutane tara da ake zargi bayan wani mummunan rikici tsakanin ƙungiyoyin ‘yan daba masu hamayya a sassan birnin Kano.
Majiyoyi sun shaida wa Zagazola Makama cewa lamarin ya faru ne da misalin ƙarfe 9 na dare a ranar 4 ga Janairu a yankunan Kawo da Mariri na birnin.
Rikicin ya shafi ƙungiyoyi biyu masu hamayya waɗanda suka hada da Kabalo da Faizu Mohammed, waɗanda aka fi sani da Chabross, daga Yar Kasuwa a Kawo.
Rahotannin sun ce tashin hankalin wani harin ramuwar gayya ne da ke da alaƙa da wani faɗa da ya faru a baya tsakanin ƙungiyoyin biyu.A farkon wannan rana, da misalin ƙarfe 1:40 na rana, an ce Faizu Mohammed ya ji wa Kabalo rauni a wani faɗa daban inda aka ruwaito cewa wannan ya fusata magoya bayan Kabalo, waɗanda daga baya suka kai harin ramuwar gayya da daddare.
A lokacin rikicin ramuwar gayya, rahotanni sun ce an daba wa Faizu Mohammed wuka a wuya da wani abu mai kaifi kuma ya sami mummunan rauni. Inda aka garzaya da shi Asibitin Musamman na Muhammadu Sanusi, inda daga baya ya mutu yayin da yake karɓar magani.
Rahotanni sun kara da cewa an mika gawarsa ga iyalansa domin a binne shi, kuma an fara samun kwanciyar hankali a yankin. Duk da haka, tashin hankali ya sake tashi a safiyar ranar 5 ga Janairu bayan rahotannin da ke cewa wasu da ake zargi ‘yan kungiyar Fa’izu ne suka taru a Kawo Quarters.
Ana zargin suna shirin sake kai hari kan Kabalo a gidansa da ke yankin Jar Kuka na Mariri.
