Fushin Matasa kan rashin tsaro ya sa su korar mataimakin Gwamnan Zamfara daga Garinsu

Wasu fusatattun matasa a garin Gwashi da ke ƙaramar hukumar Bukkuyum a Jihar Zamfara sun kori mataimakin gwamnan jihar, Malam Mani Malam Mummuni, yayin da ya kai ziyarar jajantawa ga al’ummar yankin bayan hare-haren ’yan bindiga.

Lamarin ya faru ne a ranar Lahadi, inda mazauna garin suka nuna fushinsu kan yadda suke ganin gwamnati ta gaza shawo kan matsalar tsaro.

Rahotanni sun nuna cewa matasan sun yi tururuwa tare da yi wa mataimakin gwamnan ihu, suna rera kalaman nuna rashin amincewa da shi da gwamnatin jihar.

Wasu mazauna yankin sun zargi gwamnati da yin watsi da su, musamman ganin cewa hare-haren ’yan bindiga sun jefa rayuwarsu cikin haɗari tare da hana su gudanar da harkokin yau da kullum cikin kwanciyar hankali.

Mazauna garin sun kuma koka kan rashin muhimman abubuwan more rayuwa, ciki har da hanyoyin mota masu kyau, asibiti da ruwan sha mai tsafta.

Sun bayyana cewa hare-haren ’yan bindiga sun tilasta musu zama a cikin gidajensu tsawon kwanaki shida zuwa bakwai, saboda fargabar fita zuwa kasuwanni ko gonakinsu.

Lamarin ya biyo bayan wani hari da aka kai kan matafiya a yankin, inda rahotanni suka ce an kashe jami’an tsaro da fararen hula.

Sai dai wani mutum da ke cikin tawagar mataimakin gwamnan ya musanta zargin cewa an kai hari kan ayarin motocinsa, yana mai cewa motar da aka ce an lalata ta ta samu matsalar na’ura ne kawai.

Yayin da lamarin ke ƙara jawo hankalin jama’a, masu sharhi sun yi kira ga gwamnatin jihar da ta ɗauki matakan gaggawa wajen magance matsalar tsaro, domin dawo da amincewar al’umma da ba su damar gudanar da rayuwarsu ba tare da fargabar hare-haren ’yan bindiga ba.