Sowore ya jagoranci zanga-zangar “Tinubu Must Go” a Abuja

Dan takarar shugaban ƙasa na jam’iyyar African Action Congress (AAC), Omoyele Sowore, ya jagoranci wata zanga-zanga a wasu sassan Abuja a ranar Talata, inda masu zanga-zangar suka yi ta kirari da kalmar “Tinubu Must Go”, wato suna neman Shugaba Bola Ahmed Tinubu ya bar mulki.

A wani faifan bidiyo da aka wallafa, an ga Sowore a gaban masu zanga-zangar yayin da suke tafiya a wasu titunan babban birnin tarayya, dauke da kwalaye da hoton Shugaba Tinubu da rubuce-rubucen da ke neman ya sauka daga kan mukaminsa.

Zanga-zangar ta zo ne yayin da Sowore ke ci gaba da harkokin siyasa da shirye-shiryensa na neman shugabancin Najeriya a zaben 2027.

Haka kuma, yana fuskantar shari’a a Babbar Kotun Tarayya da ke Abuja kan zarge-zargen da suka shafi wasu rubuce-rubucensa a kafafen sada zumunta game da Shugaba Tinubu.

A baya-bayan nan, Sowore da kungiyar Take-It-Back Movement sun gudanar ko goyi bayan wasu zanga-zanga a Abuja kan batutuwan siyasa da zamantakewa, ciki har da matsalar tsaro da halin da tattalin arzikin kasar ke ciki.

Sabuwar zanga-zangar ta kara sanya kalaman Sowore na adawa da gwamnatin Tinubu cikin muhimman batutuwan siyasar da ake tattaunawa gabanin 2027.