Gwamna Fintiri ya yi Alhinin rasuwar jigon APC, Sunny Monidafe

Gwamnan Jihar Adamawa, Ahmadu Umaru Fintiri, ya bayyana alhininsa matuƙa bisa rasuwar wani jigo a jam’iyyar APC, Mista Sunny Monidafe, wanda ya rasu a ranar Lahadi.

Gwamnan ya bayyana rasuwar a matsayin babban rashi ga iyalansa, jam’iyyarsa da kuma al’ummar Jihar Adamawa baki ɗaya, duba da irin gudunmawar da marigayin ya bayar a fagen siyasa da harkokin zuba jari.

A cikin wata sanarwa da Babban Sakataren Yaɗa Labaransa, Humwashi Wonosikou, ya fitar a ranar 26 ga Oktoba, 2026, Gwamna Fintiri ya ce rasuwar Monidafe ta zo ne a lokacin da har yanzu siyasar jihar da jam’iyyar APC za su iya amfana da jagorancinsa, ƙwarewarsa da shawarwarinsa.

Ya bayyana marigayin a matsayin mutum mai dabarun siyasa da kuma tarihin hidima mai kyau.

Gwamnan ya ƙara da cewa irin gudunmawar da Monidafe ya bayar a rayuwarsa, tare da kyakkyawan tarihin hidimarsa, za su sa a ci gaba da tunawa da shi.

A cewarsa, sawun da marigayin ya bari ba zai gushe ba, domin ya taka muhimmiyar rawa wajen ci gaban siyasa da zamantakewar al’ummar Adamawa da Najeriya baki ɗaya.

Haka kuma, Gwamna Fintiri ya miƙa saƙon ta’aziyyarsa ga matar marigayin, ’ya’yansa da daukacin iyalan Monidafe, inda ya buƙace su da su yi haƙuri tare da samun kwanciyar hankali daga sanin cewa marigayin ya rayu cikin girmamawa da mutunci.