Qatar da Najeriya za su rattaba hannu kan hadin kan Al’adu da yawon bude ido
Ma’aikatar raya, al’adu, da yawon bude ido, ta tattaunawa da gwamnatin Qatar, a ranar Litinin, don bunkasa huldar al’adu, fasaha, da yawon bude ido a tsakanin kasashen biyu.
Minista Hannatu Musa Musawa wadda ta gana da Dr Ali Ghamen Al-Hajri, jakadan kasar Qatar a Najeriya a Abuja, ya bayyana irin dimbin al’adun gargajiya da Najeriya ke da shi da kuma hadin gwiwa da kasar Qatar domin bunkasa fahimtar juna a tsakanin su.
Ta jaddada tarihin al’adu daban-daban na Najeriya, inda ta baje kolin kade-kade, masana’antar fina-finai, da fasaha, sannan ta nuna sha’awar hada kai da Qatar wajen adanawa da baje kolin kayayyakin tarihin Najeriya.
Jakadan ya bayyana aniyar Qatar na inganta ayyukan fasaha da al’adu, tare da jaddada rawar da take takawa a fannin diflomasiyya da hada kan kasashe.
Har ila yau, ya bayyana cewa, kasashen biyu sun karfafa dangantakarsu ta fuskar tattalin arziki sosai a cikin ‘yan shekarun nan, ta hanyar huldar diplomasiyya, don ciyar da hadin gwiwarsu gaba a fannoni da dama da suka hada da sufurin jiragen sama, da man fetur da iskar gas, da hakar ma’adinai, kayayyakin more rayuwa, da aikin gona.
An tattauna yuwuwar sanya hannu kan yarjejeniyar fahimtar juna (MOU) don tsara haɗin gwiwa, tare da bangarorin biyu suna nuna sha’awar fa’idodin haɗin gwiwar.
