Kamfanin Emirates zai dawo da jigilar jiragen sama na Najeriya bayan shekaru biyu
Kamfanin jirgin sama na Emirates ya sanar da cewa zai dawo da zirga-zirgar jiragen sama zuwa Najeriya, wanda hakan ya kawo karshen dakatarwar da aka yi kusan shekaru biyu.
Wannan ya fito ne daga Mataimakin Shugaban Kamfanin kuma Babban Jami’in Kasuwanci na Kamfanin, Adnan Kazim, a ranar Alhamis.
“Muna matukar farin cikin ci gaba da ayyukanmu a Najeriya. Muna godiya ga gwamnatin Najeriya saboda hadin gwiwa da goyon bayan da ta bayar wajen sake gina wannan hanyar, kuma muna fatan maraba da fasinjoji da za su dawo cikin jirgin,” in ji sanarwar.
Jaridar DAILY POST ta ruwaito cewa Hadaddiyar Daular Larabawa, ta dakatar da bayar da biza ga ‘yan Najeriya a shekarar 2022 bayan da Emirates ta dakatar da zirga-zirgar jiragen sama tsakanin kasashen saboda rashin iya dawo da kudaden da aka samu daga kasar.
Kamfanin jirgin ya shahara a tsakanin abokan cinikin Najeriya a baya, kuma Emirates ta ce tana fatan sake hada matafiya zuwa Dubai da kuma zuwa wurare sama da 140 tare da dawo da ayyukanta.
Dakatarwar ta zo ne bayan Shugaba Bola Tinubu da Shugaban Hadaddiyar Daular Larabawa Mohamed bin Zayed Al Nahyan sun yi taro a watan Satumban da ya gabata a Abu Dhabi.
