Harin Makiyaya: Matan Filato sun yi barazanar yin zanga-zanga tsirara, suna zargin gwamnati da gazawa.
Wata kungiyar mata a jihar Filato ta yi barazanar yin zanga-zanga tsirara saboda yawaitar hare-hare da kashe-kashen da wasu da ake zargin Fulani ne ke yi, musamman a al’ummar Berom.
Kungiyar da ke karkashin kungiyar ci gaban Mata ta Berom, BWEDA, wacce ta yi wannan barazanar a cikin wata sanarwa a ranar Asabar, ta kuma bayyana cewa tashe-tashen hankulan da ke faruwa a jihar lamari ne karara na kisan kare dangi ba wai sakamakon rikicin manoma da makiyaya ba kamar yadda jama’a ke yin imani da shi.
A cikin sanarwar mai dauke da sa hannun shugabanta, Abigail Banga, BWEDA ta bukaci gwamnati da hukumomin tsaro da su dauki matakin gaggawa domin dakile zubar da jini da ake yi a jihar.
Da take bayyana guguwar hare-haren a matsayin rashin hankali da tashin hankali, kungiyar matan ta koka kan yadda ake ci gaba da kashe-kashe da lalata daukacin al’ummomi duk da kasancewar sojoji da kayan yaki a yankin.
Matan sun kuma nuna matukar bacin ransu game da abin da suka kira gazawar gwamnati wajen samar da tsaro da adalci ga wadanda harin ya rutsa da su.
Sun soki gwamnatocin suna amfani da ziyarar ta’aziyya da jin kai, a maimakon samar da tsayuwar tsaro, mai tsauri, da kuma dogon lokaci na tsaro don kawar da tashin hankali.
