Daruruwan matasan Adamawa maza da mata sun gudanar da Zanga-zangar lumana kan zaluncin al’umma a Najeriya

Wasu gungun matasa maza da mata a karkashin inuwar ƙungiyar Motion for the Change of Nigeria sun gudanar da zanga-zangar lumana don nuna adawa da rashin adalci a cikin al’umma, kuncin rayuwa, da yunwar da ‘yan Nijeriya ke fama da su a kasar.

Kwamared Musa Andrew, a lokacin da ya jagoranci zanga-zangar lumana a Jimeta ya nuna rashin gamsuwa da yadda mafi yawan ‘yan Najeriya ke fuskantar wahala wajen cin abinci murabba’i uku a gidajensu.

Andrew ya bayyana cewa dole ne a magance wahalhalun da ake zargin rashin shugabanci na gari ya haifar da su tun kafin al’amura su kau, yana mai kira ga gwamnati da ta dauki matakin gaggawa domin jama’a su fahimci nasu.

Andrew ya bayyana cewa zanga-zanga kadai ba za ta iya sauya mumunan halin da ake ciki a kasar; a maimakon haka, ya kamata gwamnatoci a matakin tarayya, jihohi, da kananan hukumomi su dauki matakan da suka dace don tabbatar da zaman lafiya da kwanciyar hankali a cikin al’umma.

A cewarsa, cin hanci da rashawa da rashin gudanar da mulki na daga cikin munanan dabi’u da ke damun al’umma, inda ya bayar da misali da kalubalen da ke fuskantar ‘yan sandan da suka yi ritaya, wadanda ya ce suna komawa gida da kashi 40% na fansho, inda kashi 60 cikin 100 ake zargin an wawure.

Ita ma a nata jawabin a wajen taron, wata ‘yar kungiyar Misis Biyaya Clement, ta dage cewa ‘yan kasar na fama da yunwa, musamman ma iyaye mata masu kula da yara.

Misis Clement ta shawarci gwamnatoci da su yi abin da ya kamata wajen samar da sabbin hanyoyin magance wadannan kalubalen da ke fuskantar al’umma, inda ta yi nuni da cewa ‘ya’yansu ba sa mayar da hankali kan karatunsu sakamakon yunwa da wahala.

Galibin mahalarta zanga-zangar sun bukaci gwamnatoci da su dauki kwararan matakai wajen magance matsalar rashin tsaro a yankin Arewa maso Gabas da ma kasa baki daya.