Adamawa ta amince da Naira bilyan 11.4 don gina sansanin NYSC, da sauran ayyukan raya ƙasa
Gwamnatin Jihar Adamawa ta amince da kwangiloli masu darajar Naira Bilyan 11.4 don ayyukan ci gaba daban-daban, ciki har da gina sabuwar sansani na dindindin na Hukumar Kula da matasa masu yiwa Ƙasa hidima (NYSC) a Malkohi a Ƙaramar Hukumar Yola ta Kudu, kan Naira Bilyan 7.7.
An cimma waɗannan shawarwarin ne a taron majalisar zartarwa na mako-mako wanda Gwamna Ahmadu Umaru Fintiri ya jagoranta wanda aka gudanar a Fadar Gwamnati a ranar Laraba a Yola.
Kwamishinan Yaɗa Labarai da Dabaru na Jihar, James Iliya, ya bayyana hakan a wata hira da manema labarai jim kaɗan bayan taron, yana mai bayyana cewa an raba aikin sansanonin NYSC zuwa rukuni 21, waɗanda ‘yan kwangila 21 za su kula da su, kuma ana sa ran kammala shi cikin watanni shida daga ranar da aka sanya hannu kan kwangilar.
Iliya ya bayyana cewa sabon sansanonin zai bai wa gwamnati damar mayar da ayyukan NYSC daga wurin wucin gadi na yanzu dake Damare a ƙaramar hukumar Girei zuwa garin Malkohi a ƙaramar hukumar Yola ta Kudu a jihar.
A cewar kwamishinan, majalisar ta kuma amince da gyara tare da haɓaka Asibitin Cottage, Gulak, a yankin karamar hukumar Madagali, kan kuɗi Naira biliyan 1.5. Ana sa ran kammala aikin, wanda kamfanin Reach Shortskill Limited zai gudanar, cikin makonni 52.
Bayan haka, majalisar ta amince da gyaran da haɓaka Asibitin Cottage, Guyuk (Mataki na II), kan kuɗi sama da Naira miliyan 693, wanda Samima Investment Limited za ta kammala cikin makonni 52.
Hakazalika, Mista Iliya ya sanar da cewa majalisar ta bayar da kwangilar siyan magunguna ga Cibiyar Rarraba Magunguna ta Jiha, kan jimillar kuɗin kwangila sama da Naira miliyan 499. Malina Pharmaceutical Limited za ta kammala samar da kayayyaki cikin ‘yan makonni.
Dangane da ayyukan ruwa, kwamishinan ya bayyana cewa majalisar ta amince da haɓaka tsarin samar da ruwa na Guyuk kan kuɗi sama da Naira miliyan 499. Ana sa ran kammala aikin, wanda Hill Water Resources Nigeria Limited zai gudanar, cikin watanni uku.
Ya ƙara da cewa an yi watsi da tsarin samar da ruwa tsawon shekaru da dama, kuma gwamnati ta ga ya zama dole ta farfaɗo da shi don tabbatar da cewa mazauna Guyuk suna jin daɗin ribar dimokuraɗiyya kamar sauran al’ummomi.
Bugu da ƙari, James Iliya ya ce majalisar ta amince da ƙarin Naira miliyan 117 don gyaran wutar lantarki a Bahuli da ke ƙaramar hukumar Mubi ta Arewa, wanda za a kammala cikin watanni uku ta hannun wannan ɗan kwangilar, Messrs S da S Business Bureau Limited.
