Liverpool tayi rashin nasara a hannun United har gida
Manchester United ta je ta doke Liverpool 2-1 a wasan mako na takwas a Premier League ranar Lahadi, karon farko da ta yi nasara a Anfield bayan Janairun 2016.
United ce ta fara cin ƙwallo ta hannun Bryan Mbeumo, Liverpool ta farke ta hannun Cody Gakpo a zagaye na biyu.
Daf da za a tashi ne Harry Maguire ya kara na biyu da ya bai wa United maki ukun da take bukata.
Kuma karon farko da kociya, Ruben Amorim ya ci wasa biyu a jere tun bayan da ya karɓi aikin horar da United a cikin watan Nuwambar 2024.
Wannan shi ne karon farko da aka doke Liverpool a wasa huɗu a jere a dukkan fafatawa, tun bayan Nuwambar 2014, karkashin Brendan Rodgers.
Wasannin da aka ci Liverpool a jere ya haɗa da 2-1 a hannun Crystal Palace a Premier League da 1-0 a gidan Galatasaray a Champions League da wanda Chelsea ta yi nasara 2-1 a Stamford Bridge a Premier da kuma na Manchester United da ta ci 2-1 a Anfield a Premier League.
